കോട്ടയം:മാലിന്യമുക്തകേരളം പദ്ധതിയുടെ ഭാഗമായി കോട്ടയത്ത് മാധ്യമ-ഉദ്യോഗസ്ഥ കൂട്ടായ്മ സംഘടിപ്പിക്കുന്നു. ബുധനാഴ്ച രാവിലെ 11.30 ന് ഹോട്ടല്‍ ഓര്‍ക്കിഡ് റസിഡന്‍സിയില്‍ കൂട്ടായ്മ ആരംഭിക്കും. പ്രമുഖ പത്രപ്രവര്‍ത്തകന്‍ കെ.എം. റോയ് മുഖ്യ പ്രഭാഷണം നിര്‍വ്വഹിക്കും. ജില്ലാ കലക്ടര്‍ മിനി ആന്റണിയുടെ അധ്യക്ഷതയില്‍ ജില്ലാ പഞ്ചായത്ത് പ്രസിഡന്റ് ടി.എന്‍. രമേശന്‍ കൂട്ടായ്മ ഉദ്ഘാടനം ചെയ്യും. ഇന്‍ഫര്‍മേഷന്‍ ഡെപ്യൂട്ടി ഡയറക്ടര്‍ വി.കെ. ജയകുമാര്‍ മോഡറേറ്ററായി നടക്കുന്ന ചര്‍ച്ചയില്‍ സമ്പൂര്‍ണ്ണ ശുചിത്വ യജ്ഞം ജില്ലാ കോ-ഓര്‍ഡിനേറ്റര്‍ ജോസ് മുളളംകുഴിയില്‍ മാലിന്യമുക്ത കേരളം പദ്ധതി അവതരിപ്പിക്കും. ചര്‍ച്ചയ്ക്ക് പത്രപ്രവര്‍ത്തകരായ ജേക്കബ് കെ. ഈപ്പന്‍, ആര്‍. രാജീവ് എന്നിവര്‍ നേതൃത്വം നല്‍കും. ദാരിദ്യ്രലഘൂകരണ പ്രോജക്ട് ഡയറക്ടര്‍ മാത്യു എ. മത്തായി, ജില്ലാ മെഡിക്കല്‍ ഓഫീസര്‍ ഡോ. എസ്. വത്സലകുമാരി, പദ്ധതി അസി. കോ- ഓര്‍ഡിനേറ്റര്‍ എം.കെ. ശശിയപ്പന്‍ എന്നിവര്‍ കൂട്ടായ്മയിലെ വിവിധ സംഗമങ്ങള്‍ക്ക് നേതൃത്വം നല്‍കും. പ്രമുഖ വാര്‍ത്താലേഖകര്‍, വിദ്യാഭ്യാസം, പഞ്ചായത്ത്, സാമൂഹ്യക്ഷേമം, ആരോഗ്യം, റവന്യൂ വകുപ്പുകളുടെ ജില്ലാ മേധാവികള്‍, പഞ്ചായത്ത്- മുനിസിപ്പല്‍ അസോസിയേഷന്‍ പ്രതിനിധികള്‍ തുടങ്ങിയര്‍ പങ്കെടുക്കുമെന്ന് ജില്ലാ ഇന്‍ഫര്‍മേഷന്‍ ഓഫീസര്‍ എ.എ. ഹക്കിം അറിയിച്ചു