കോട്ടയം: കോടിമതയിലെ പച്ചക്കറി മാര്‍ക്കറ്റിലെ 38 മുറികളുടെ ലേലം 27ന്‌ രാവിലെ 11ന്‌ നഗരസഭാ ഓഫിസില്‍ നടക്കും. എന്നാല്‍ ഇവ ലേലം ചെയ്‌തു പോകുമോയെന്ന ആശങ്കയിലാണ്‌ നഗരസഭ. നേരത്തെ നാലുതവണ ലേലം ചെയ്‌തിട്ടും 11 കടമുറികള്‍ മാത്രമാണ്‌ ലേലത്തില്‍ പോയത്‌. കോടിമതയില്‍ മാര്‍ക്കറ്റ്‌ ആരംഭിച്ചാല്‍ കച്ചവടസാധ്യത കുറഞ്ഞേക്കാമെന്നാണ്‌ വ്യാപാരികളുടെ ഭയം. വഴിയോര പച്ചക്കറി വ്യാപാരം ഇപ്പോള്‍തന്നെ ശക്തമാണ്‌. പച്ചക്കറിവ്യാപാരം മാറ്റിയാല്‍ വഴിയോരവാണിഭം കൂടും. ഇതോടെ കോടിമതയിലെ ചന്തയില്‍ വ്യാപാരം കുറയുമെന്നും വ്യാപാരികള്‍ പറയുന്നു.
കോടിമതയിലെ മത്സ്യമാര്‍ക്കറ്റില്‍ ഇപ്പോള്‍ വ്യാപാരം നല്ല രീതിയില്‍ നടക്കുന്നുണ്ടെന്നും അതുകൊണ്ടുതന്നെ ഉപഭോക്താക്കള്‍ എത്തില്ലെന്നു പറയുന്നത്‌ ശരിയല്ലെന്നും നഗരസഭാ അധികൃതര്‍ അറിയിച്ചു.